Atlántica 2018

Un ano máis e xa van seis. Atlántica, o Festival Internacional de Narración Oral, sae a navegar polo mar das historias.
Este ano coincidindo co aniversario da visita de Xulio Verne e coa creación do primeiro submarino galego por parte de Sanjurjo Badía, a nosa imaxe non podía ser outra.

Volvemos co abraio dunha nena ou neno que por primeira vez mete a cabeza baixo a auga e descobre que o mundo é aínda meirande do que pensaba. Así toda a tripulación de Atlántica surca mares novos. Territorios inexplorados, palabras estrañas, melodías nunca escoitadas.

Convidamos a ocupar un lugar detrás de cada ollo de boi, ou a coller o periscopio, para non perder detalle desta travesía. Non fai falta conter o aire, porque levamos os depósitos cheos do mellor osíxeno do mundo, a ilusión.

Nas profundidades escoitaremos historias de illas, de papaventos, de casas encantadas, de animais mitolóxicos, historias de terras distantes e de aquí á volta de casa, romances e versos de mulleres que debuxan poesía coas súas mans, naufraxios e naufrexios, cantos esquencidos, medos inmensos, risas que debuxan ronseis no mar, contos para celebrar a nosa memoria e identidade atlánticas, como un patrimonio de incalculable valor.

Se atopan un señor que nos sorrí con dozura, un señor de blusa que fai xogo cos seus ollos claros, saúdeno : é Tim Bowley, o noso Berobreo nas inmensidades azusis, que xa é o noso gardián eterno.

 

Todos a bordo! Inmersión!