Quen vai estar?

Soledad Felloza

Nacín a beiras dun río que en lingua guaraní quere dicir de paxaros pintados, Uruguai.
As madreselvas aroman a miña infancia e acubillan os meus amores primeiros. As rúas anchas de terra esconden as primeiras letras que esborranchei e baixo o areeiro da praza Bela Vista enterrei un día as miñas miradas tortas e funme polo mundo a contar as miñas mentiras máis verdadeiras.
Facendo contas, débenme de quedar por vivir 54 anos, aínda que preferiría que fosen 68 ou 72. Así e todo, algunhas cousas teño feitas. Algunhas que me enchen de orgullo, outras que se fose máis clariña de pel, ruborizaríanme.
Actuei e contei contos en Festivais de Uruguai, Arxentina, Chile, Bolivia, Venezuela, Cuba, Alxeria, Perú, Francia, Italia,Portugal, Holanda. Contei contos en toda España, menos en Cantabria.
Namórome cada vez que me subo ao escenario e sufro cando baixo. Aínda non contei o mellor conto, pero se sinto que me achego, ese día collerei a miña Nikon e quedareime en Corrubedo ou Cabo Polonio para sempre. Mentres tanto, aquí vou, esta son ou intento ser.

 

Bailar nas nubes | Para nenos de 3 a 6 anos
Unha nena soña con bailar coas nubes, pero a súa casa está pegadiña a terra e moi lonxe do ceo!
Só a axuda de novos veciños fará que o soño sexa unha realidade.
Veciños diferentes, chegados de afastadas terras, co corazón ferido, o namorado, o pechado baixo sete chaves, abrirán as mans e as nubes, bailarán con todos.
Espectáculo inspirado no libro de Vanina Starkoff de Editorial Kalandraka. O libro é unha viaxe poética e visual para chegar a bailar coas nubes. No espectáculo cóntase a historia (creación libre) de cada unha das casas, das persoas que fan posible o soño. Porque a historia de cada un de nós é unha tea feita dos fíos da memoria de todos.

A viaxe de Lup
Lupodivico Fernando Gómez de Tipiminí é un lobo moito mas pequecho que o nome tan longo que lle puxera a súa nai, por iso todo o mundo chámalle Lup. Lup, un día preparou a súa maleta, e foise a dar a volta ao mundo. Un xersei, unha bufanda, unhas medias moi quentiñas de lá, un libro de contos, unha pucha, unha mantiña, a cámara de fotos, e un chupete…un chupete! ¿Un chupete é una cousa para levar nunha viaxe tan divertida?
Espectáculo de contos con son, versos é pequenos obxetos para bebés de 10 meses a 3 anos.